रिमझिम

रिमझिम
अंधारले नभ, ढग दाटलेले
तरंग उठले, मनोमनी..!

गारवा अंगात, पाऊस भिनला
हळूच शिरला, पानोपानी..!

नदी ओढे नाले, ओतप्रोत झाले
अवखळ चाले, प्रवाहाने..!

रानाच्या वाटेने, दरी नि कपारी
रंगते दुपारी, रिमझिम..!

वृक्ष लता वेली, हिरवे गालीचे
स्वप्न या मनीचे, बहरते..!

रान चिंबचिंब, माती मऊ ओल
अंकुरले खोल, कोंभ नवे ..!
• रघुनाथ सोनटक्के

श्रावण

श्रावण

रिमझिमतो श्रावण
घनदाट रानोमाळी
हिरवे होत चराचर
फुले सोनसकाळी

कुहूकुहू करे कोकिळ
नाचे मोर पिसार्‍यातून
हळूच डोकावे अनिल
ढगांच्या पसार्‍यातून

कधी कोवळी तिरीप
लख्ख दाह तो नभी
इंद्रधनू सप्तरंगासवे
खुलवत राहे कधी

वाहे अवखळ वारा
बिलगतो प्रिया परी
तारूण्य असे बहरले
सुरूच हलक्या सरी

निसर्ग तो धरणीला
वेढून घेत मनोहारी
सुंदर मनमोहक भासे
धरा ही राधा बावरी
• रघुनाथ सोनटक्के, पुणे
  मो. ८८०५७९१९०५

२६ जुलै २०२०, दै. युतीचक्र 
३० जुलै २०२०, दै. आदर्श महाराष्ट्र 

 

 

बियाणं

बियाणं

निजलं मातीत

तान्हुलं बियाणं

बरसेन धोधो

उगावं जोमानं

काळ्या भू पडलं

पोटी गोड सपान

रान होईल हिरवं

पीकाच्या रूपानं

कुठे दोन पाती

ये ढेकुळ फोडून

विनवे विठोबाला

दोन हात जोडून

थोडासा शिरवा

जातो ढग पळून

एवढसं रोप ते

जाईन रे जळून

जगण्या धडपडे

गेलं भारानं वाकून

ओतलं मी सारं

ना हातचं राखून

भिजव रान सारं

नव्या तू दमानं

जीव सोडला काही

कोवळ्या कोंबानं

• रघुनाथ सोनटक्के, पुणे

  मो. ८८०५७९१९०५

२५ जुन २०२० दै. आदर्श महाराष्ट्र 
२५ जुन २०२० दै. युतीचक्र 
३० जुन २०२० दै. जनमाध्यम

  

बेवळा

बेवळा

रोज पायजे त्याले प्याले
खाले चकना दाणे काजू
मस्तवाल झाला साला
रायला हा बेवळा माजू

पिऊन पिऊन रोज
सळ्लं याचं लिवर
कदी पेते देसी कोरी
कदी गावरान पिवर

बायको पोरायले झोळ्ते
भांडे-कुंडे टाकते ईकून
मारामारी गाली गलोच
मारते हाती ईल ते फेकून

पेल्यावर मानत नाई कोनाले
बोलते इंग्लिस केवळा
सुनत नाई कोनाच्या बापाची
हाय हा इब्लिस बेवळा

सारं केलं वाटोय यानं
नुसतं पायजे याले खंबा
अस्या बेवळ्याचं काई खरं नाई
शेवटी होते मंग तो लंबा

• रघुनाथ सोनटक्के

 २१ मे २०२०, दै. युतीचक्र

माही झोपळी

माही झोपळी
सुख नांदते घरात
नाई कायचीच कमी
वठी शब्द पेरमाचा
हाय आनंदाची हमी...

चुलीवर मी भाजतो
घामा भिजली भाकर
भुक पोटाची मिटते
येते तृप्तीचा ढेकर....

नेमी दुळ्ळीत रायते
भाजी भाकर कुटका
जाये ना उपासी कोनी
दारातून ह्या भटका...

भीती उभ्या ममतेच्या
देते सावली छप्पर
घारघुर रोज मले
झोप लागते अपार...

काम हाताले झटून
देते बापाचं वावर
पोरं बायको भक्कम
हावो जीता मी जोवर
• रघुनाथ सोनटक्के
 ९ मे २०२०, दै. आदर्श महाराष्ट्र आणि दै. युतीचक्र
१० मे २०२०, दै. जनमाध्यम 

   

पाखरं

पाखरं

अंगणी येणारी सारी

झाली गायब पाखरं

चिऊ काऊ सर्वाशी

खेळती सान लेकरं

झाडांवर विणे पक्षी

काड्या-कापसाचा खोपा

चिवचिव पडे कानी

घेता झाडावर झोका

दारामधे धान्य वाळे

भुर्र टिपायचे किडा

सकाळ, संध्येला नभी

दिसत मोहक माळा

धान, बाज्रा पिकांवर

झुंडीने ती बसायची

त्यांच्यासह आपल्याला

काही कमी नसायची

चिऊ आणि काऊसंगं

बाळं गिळायची घास

झोपी जात अंगाईला

येई मायेचा हो वास

• रघुनाथ सोनटक्के

  मो. ८८०५७९१९०५

१६ एप्रिल २०२०, आदर्श महाराष्ट्र  

१७ एप्रिल २०२०, जनमाध्यम 

 

२२ एप्रिल, युतीचक्र  

 

 

भीमराया

भीमराया
तोडून गुलामी | केलीस करणी
घेतली लेखणी | हाती भीमा..
तुझी प्रज्ञा मोठी | झुकली मस्तके
वाचली पुस्तके | अहोरात्र..
माणूसपणाची | दिली तू जाण
आणलेस भान | जागवून..
तळपता सूर्य | नवीन प्रभात
स्वप्न या डोळ्यात | रूजविले..
अज्ञान, अंधार | दूर जळमटे
दिसला पहाटे | ज्ञानसूर्या..
झाला तू कैवारी | कोटी उपकार
समता सागर | भीमराया..
दिले सम हक्क | स्त्री, दुबळ्यांस
लिहले देशास | संविधान
• रघुनाथ सोनटक्के

 १५ एप्रिल २०२०, आदर्श महाराष्ट्र

पहिला पाऊस

पहिला पाऊस

जीव कासाविस
शुष्क सारी भुई
सगळ्यांची होई
लाहीलाही

दाटला अंधार
सुसाटला वारा
आसमंत धरा
 गंधाळली

टप टप थेंब
सरीवर सरी
तृप्त सृष्टी सारी
प्राणीमात्र

गर्द झाडेवेली
नटली अवनी
पक्षी गातो गाणी
रानोमाळी

रम्य चराचर
दृश्य मनोहर
हर्ष सभोवार
दाटलेला
• रघुनाथ सोनटक्के ‎

११ जून २०१९ दै. औरंगाबाद केसरी मधे प्रकाशित
१८ जून २०१९ च्या साप्ताहिक सायबर क्राईम मधे प्रकाशित
१५ जून २०१९ च्या दै. स्वाभिमानी छावा मधे प्रकाशित
१९ जून २०१९ च्या दै. वाचकमंच मधे प्रकाशित  
२७ जून २०१९ च्या दै. मराठवाडा संचार मधे प्रकाशित 
साप्ताहिक झी मराठी दिशा, २१ जून २०१९ ला प्रकाशित
http://www.zeemarathidisha.news/Details?NewsId=5624415757003576617&title=pahila%20paus&SectionId=4805737089856539540&SectionName=%E0%A4%95%E0%A4%B5%E0%A4%BF%E0%A4%A4%E0%A4%BE 

                  

 

मातेरं

« मातेरं »

दुष्काळाचा शाप
लागे माह्या मांगं
वावरात पिकाचा
ना कसलाच थांगं

फेडू कसं मग
सावकाराचं रिनं
पदरी पडे फकस्त
पैकाच तिनं

पोेरांचं शिक्षाण
सुटलंया मदी
कशी तगेल हीर
जर आटलीच नदी

न्हाती धूती पोर
म्हणं करू लगनं
तुरीला फुलू देगा
केलीया राखणं 

कापसाचं फुललं
उधारीत बोंड
लपून चाले लक्षुमी
पदरात तोंड

कापडं शिवू म्हणं
फाटलं धोतरं
शेतीमधे मरून
झालंया मातेरं

- रघुनाथ सोनटक्के 
तळेगाव, पुणे 8805791905

 दै.  पथदर्शी  २६ नोव्हेंबर २०१८ ला प्रकाशित कविता
दै.  विदर्भ मतदार २५ नोव्हेंबर व ९ डिसेंबर २०१८ ला प्रकाशित
झी मराठी दिशा साप्ताहिकात प्रकाशित माझी कविता
(३ फेब्रुवारी २०१९ च्या दै. लोकशाही वार्ता मधे प्रकाशित)
१६ मे २०१९ च्या दै. वाचकमंच मधे प्रकाशित
३१ मे २०१९ च्या दै. बंधुप्रेम मधे प्रकाशित 
९ जून २०१९ च्या स्वतंत्र भारत, समर पुरवणीत प्रकाशित
१८ जून २०१९ च्या दै. एकमत साक्षी पुरवणीमधे प्रकाशित 
३ मार्च २०२० च्या साप्ताहिक कृषकोन्नती मधे प्रकाशित

 

अवयवदान

« अवयवदान »

अवयवदान । करूया सारे

मरून उरा रे । जगती या ।।

पाप-पुण्याचा । कशा लेखाजोखा ।

दुर करा धोका । गरजुचा ।।

मरावे परी या । जगती उरावे

दान करावे । देह आपले ।।

रूढी-समजुतींना । देवुनी फाटे ।

दान करा मोठे । अवयवांचे ।।

अंधाला दृष्टी द्या । कुणाला हृदय

ब्रेनडेड होता । दान करा ।।

काळीज आपलं । देवून थोडं ।।

करा जीव गोड । आजार्‍याचा ।।

किडनी न् डोळे। आहेत दोन

वाचतील प्राण । एक देता ।।

त्वचा, आतडे । करा रक्तदान

वाचवा प्राण । वंचितांचे ।।

• रघुनाथ सोनटक्के

  तळेगाव दाभाडे, पुणे

  मो. 8805791905

९ ऑक्टोबर २०१८ च्या सायबर क्राईम मध्ये प्रकाशित 

  

मी आणि तू

« मी आणि तू »

मी मंदिराची पायरी

तु देवाचा कळस

तु अंगणातली तुलसी

मी रानातला पळस

मी तप्त लाव्हा

तू गार वारा 

मी भ्रमणारा ग्रह 

तू तेजस्वी तारा

मी शुभ्र आकाश

तू हिरवी धरा

विरहात तुझ्या

पावसाच्या धारा

मी उजाड डोंगर

तू प्रवाही नीरा

तू प्रेमाचा सागर

मी छोटासा झरा

तू सुंदर फुल 
मी तुझाच गंध 
तू माझी कविता
मी तुझा छंद 

मी तुझा सागर

तु माझी सरीता

विशाल असलो तरी 

तुझ्याविणा रीता

•••

रघुनाथ सोनटक्के 

तळेगाव दाभाडे, पुणे 

मो. ८८०५७९१९०५

१८ डिसेंबर २०१८ साप्ताहिक सायबर क्राईम मध्ये,  २५ डिसेंबर २०१८ च्या दै. स्वाभिमानी छावा, तसेच २७ डिसेंबर २०१८ च्या दै. लोकमंथन मधे प्रकाशित (https://www.readwhere.com/read/1953901#page/4/2)
 ३० डिसेंबर २०१८ च्या दै. तरुण -भारत (नागपूर) मधे प्रकाशित
(३ फेब्रुवारी २०१९ च्या दै. बलशाली भारत मधे प्रकाशित) 
(४ फेब्रुवारी २०१९ च्या दै. मराठवाडा संचार मधे प्रकाशित)
१ ऑगस्ट २०१९ च्या दै. पुण्यनगरीत प्रकाशित

 

   

 

नकोस

« नकोस »

आधीच तुटलोय मी

पुन्हा तोडू नकोस

सोसलंय बरंच काही 

पुन्हा छळू नकोस

हळूवार तुझं अागमन

देवून गेलं गारवा

आशेच्या पालवीला  

पुन्हा जाळू नकोस

तुझं हसणं, बोलणं

लाजणं तुझं भारी

आवडतेस तु खुप

सोडून जाऊ नकोस

नभांसारखं तुझं मन

धरणीसारखे डोळे

ह्रदयाला माझ्या तू

तोडून जाऊ नकोस

स्वप्नांचा बांधलाय इमला

आहे गरिबाची झोपडी

पाहून कुणाच्या महालाला

मोडून जाऊ नकोस

• रघुनाथ सोनटक्के

  तळेगाव दाभाडे, पुणे

  मो. ८८०५७९१९०५

दि. २४ जून २०१८ च्या दै. विदर्भ मतदार मधे प्रकाशित 

शब्द

 « शब्द »

शब्द तोडतात क्षणात मनामनातील नाती

शब्दच होतात कधी शिपंल्यातील मोती

धन, देह नश्वर, शब्दच उरतात अंती

वाफ होऊन तरंगत राहते बाकी आसमंती

शब्दच पसरवतात हिंसा, भेद, मत्सर विखारी

कुणी शब्दांचा रसिक, तर कुणी असतो भिकारी

कुणी करावा जप शब्दांचा, कुणी कराव्या ढाली

कुणी व्हावा अंगार, तर कुणी कराव्यात मशाली

शब्दानेच होतो ‘वाल्मिकी’,  कुणी होतो मवाली

शब्दच होतात गोड, बाकी सारं ‘त्याच्या’ हवाली

शब्द कायदा, शब्द वायदा, कुणाचा असतो कव्वाली

त्यानेच होते शिक्षा, समाधान, अन् ‘भावा’ची वसुली

         • रघुनाथ सोनटक्के, मो. 8805791905

१ नोव्हेंबर २०१८ च्या दै. पथदर्शी मधे प्रकाशित  
२ डिसेंबर २०१८ च्या दै. डहाणू मित्र मधे प्रकाशित

 

फार झाले

फार झाले

चाखुन फार झाले शब्द तुझ्या ओठीचे

काढून फार झाले अर्थ त्या मिठीचे

नाव ना सुचले तुज आपल्या नात्याला

वापरून फार झाले शब्द मज गाठीचे

गायले मी तुजसाठी प्रोचे तराणे

काय झाले आता गोड त्या भेटीचे

खंबीर होती तु हरवेळी मजसाठी

मग कारण काय होते कुठल्या भीतीचे

मजसाठी तु झुगारले बंध वेळोवेळी

मग पाळले नियम तु कोणत्या रितीचे

- रघुनाथ सोनटक्के

8805791905

मासिक साहित्य चपराक मधे प्रकाशित 

पाऊस

पाऊस  - रघुनाथ सोनटक्के

काड्यांची छत्री

श्रावणाचा पाऊस

माझ्याविणा नको

गाणे 'ते' गाऊस

भिजलेला पदर

ओला ओला पाऊस

रूपासाठी नको

आणी काय लेवुस

खिडकीतुन डोकाव

रिमझिम पाऊस

माझ्याविणा नको

गरम चहा पिवुस

गार गार वारा

आणतोय पाऊस

चुलीमधे नको

माझं मन जावुस

तेच जुनं पुस्तक

परत तोच पाऊस

जुन्या त्या गुलाबाचा

गंध नको घेवुस

• रघुनाथ सोनटक्के

९ जून २०१८ च्या दै. युवा छत्रपतीमध्ये प्रकाशित

२४ जून २०१८ च्या दै. तरुण भारत, अक्षरधारा पुरवणी मध्ये प्रकाशित 

http://epaper.tarunbharat.com/1708596/Aksharyatra/AKSHARYATRA#page/6/1

९ सप्टेंबर २०१८ च्या दै. जनशक्ती (मुंबई) मधे प्रकाशित

http://epaper.ejanshakti.com/1808853/Mumbai-Janshakti/09-09-2018#page/8/1

१८ ऑगस्ट २०१९, दै. तरुण भारत, आसमंत पुरवणीत प्रकाशित

२२ ऑगस्ट २०१९, दै. एकमत साक्षी पुरवणीत प्रकाशित

१० सप्टेंबर  २०१९ दै. सकाळ, अकोला मधे प्रकाशित   

१ सप्टेंबर २०१९ दै. हिंदुस्थानमधे प्रकाशित

                         

 

घडू नये पाप

घडू नये पाप
(बलात्काऱ्याला उद्देशुन)

नकोस करू अत्याचार
छळू नकोस दादा
आई-बहीण माझ्यासारखी
असेल तुला सुद्धा

असा कसा वागू शकतो
मीपण आहे कुणाची ताई
जनावरासारखा वाग म्हणुन
काय सांगते तुझी आई

क्षणापुरत्या वासनेसाठी
जाळतो माझा देह
तुझ्या आईबहिणीलाही
का करतो असा स्नेह

राहून राहून येते मला
माझ्या आईबाबांची याद
तू तर जाशील सोडून
सावरेल कोण माझ्या बाद

छळतील लोक तुला
पिळतील माझे शरीर
जगशील अपमानित
वाटू दे फिकीर

आग दाबून शरिराची
शहाण्यासारखं वाग
आतमधल्या सैतानाला
ठेचून तू काढ

रघुनाथ सोनटक्के

तळेगाव, पुणे, 8805791905

३१ डिसेंबर २०१८ च्या दै. स्वाभिमानी छावा मधे प्रकाशित