रिमझिम

रिमझिम
अंधारले नभ, ढग दाटलेले
तरंग उठले, मनोमनी..!

गारवा अंगात, पाऊस भिनला
हळूच शिरला, पानोपानी..!

नदी ओढे नाले, ओतप्रोत झाले
अवखळ चाले, प्रवाहाने..!

रानाच्या वाटेने, दरी नि कपारी
रंगते दुपारी, रिमझिम..!

वृक्ष लता वेली, हिरवे गालीचे
स्वप्न या मनीचे, बहरते..!

रान चिंबचिंब, माती मऊ ओल
अंकुरले खोल, कोंभ नवे ..!
• रघुनाथ सोनटक्के

बियाणं

बियाणं

निजलं मातीत

तान्हुलं बियाणं

बरसेन धोधो

उगावं जोमानं

काळ्या भू पडलं

पोटी गोड सपान

रान होईल हिरवं

पीकाच्या रूपानं

कुठे दोन पाती

ये ढेकुळ फोडून

विनवे विठोबाला

दोन हात जोडून

थोडासा शिरवा

जातो ढग पळून

एवढसं रोप ते

जाईन रे जळून

जगण्या धडपडे

गेलं भारानं वाकून

ओतलं मी सारं

ना हातचं राखून

भिजव रान सारं

नव्या तू दमानं

जीव सोडला काही

कोवळ्या कोंबानं

• रघुनाथ सोनटक्के, पुणे

  मो. ८८०५७९१९०५

२५ जुन २०२० दै. आदर्श महाराष्ट्र 
२५ जुन २०२० दै. युतीचक्र 
३० जुन २०२० दै. जनमाध्यम

  

बेवळा

बेवळा

रोज पायजे त्याले प्याले
खाले चकना दाणे काजू
मस्तवाल झाला साला
रायला हा बेवळा माजू

पिऊन पिऊन रोज
सळ्लं याचं लिवर
कदी पेते देसी कोरी
कदी गावरान पिवर

बायको पोरायले झोळ्ते
भांडे-कुंडे टाकते ईकून
मारामारी गाली गलोच
मारते हाती ईल ते फेकून

पेल्यावर मानत नाई कोनाले
बोलते इंग्लिस केवळा
सुनत नाई कोनाच्या बापाची
हाय हा इब्लिस बेवळा

सारं केलं वाटोय यानं
नुसतं पायजे याले खंबा
अस्या बेवळ्याचं काई खरं नाई
शेवटी होते मंग तो लंबा

• रघुनाथ सोनटक्के

 २१ मे २०२०, दै. युतीचक्र

माही झोपळी

माही झोपळी
सुख नांदते घरात
नाई कायचीच कमी
वठी शब्द पेरमाचा
हाय आनंदाची हमी...

चुलीवर मी भाजतो
घामा भिजली भाकर
भुक पोटाची मिटते
येते तृप्तीचा ढेकर....

नेमी दुळ्ळीत रायते
भाजी भाकर कुटका
जाये ना उपासी कोनी
दारातून ह्या भटका...

भीती उभ्या ममतेच्या
देते सावली छप्पर
घारघुर रोज मले
झोप लागते अपार...

काम हाताले झटून
देते बापाचं वावर
पोरं बायको भक्कम
हावो जीता मी जोवर
• रघुनाथ सोनटक्के
 ९ मे २०२०, दै. आदर्श महाराष्ट्र आणि दै. युतीचक्र
१० मे २०२०, दै. जनमाध्यम 

   

पाखरं

पाखरं

अंगणी येणारी सारी

झाली गायब पाखरं

चिऊ काऊ सर्वाशी

खेळती सान लेकरं

झाडांवर विणे पक्षी

काड्या-कापसाचा खोपा

चिवचिव पडे कानी

घेता झाडावर झोका

दारामधे धान्य वाळे

भुर्र टिपायचे किडा

सकाळ, संध्येला नभी

दिसत मोहक माळा

धान, बाज्रा पिकांवर

झुंडीने ती बसायची

त्यांच्यासह आपल्याला

काही कमी नसायची

चिऊ आणि काऊसंगं

बाळं गिळायची घास

झोपी जात अंगाईला

येई मायेचा हो वास

• रघुनाथ सोनटक्के

  मो. ८८०५७९१९०५

१६ एप्रिल २०२०, आदर्श महाराष्ट्र  

१७ एप्रिल २०२०, जनमाध्यम 

 

२२ एप्रिल, युतीचक्र  

 

 

भीमराया

भीमराया
तोडून गुलामी | केलीस करणी
घेतली लेखणी | हाती भीमा..
तुझी प्रज्ञा मोठी | झुकली मस्तके
वाचली पुस्तके | अहोरात्र..
माणूसपणाची | दिली तू जाण
आणलेस भान | जागवून..
तळपता सूर्य | नवीन प्रभात
स्वप्न या डोळ्यात | रूजविले..
अज्ञान, अंधार | दूर जळमटे
दिसला पहाटे | ज्ञानसूर्या..
झाला तू कैवारी | कोटी उपकार
समता सागर | भीमराया..
दिले सम हक्क | स्त्री, दुबळ्यांस
लिहले देशास | संविधान
• रघुनाथ सोनटक्के

 १५ एप्रिल २०२०, आदर्श महाराष्ट्र

नाही विसरलो

• नाही विसरलो •

डोळ्यांनी अश्रू गाळणं सोडलं
बंद पापणीआड दु:ख आहे दडलं
अजून तुला नाही मी विसरलो

नसेल घेलते ओठी तुझे नाव
मनी वसलेले फक्त तुझे गाव
हृदयावर नाव तुझं आहे गोंदलं
अजून तुला नाही मी विसरलो

नसेल आणत जरी मोगर्‍याची फुलं
आठवतात तुझ्या कानातले ते डुलं
शांततेनं हृदयात वादळ आहे जपलं
अजून तुला नाही मी विसरलो

रात्रीला आठवतो बघून आकाशी
तुटतांना तारा तुला मागतो मनाशी
देवाला फक्त तेवढंच आहे मागलं
अजून तुला नाही मी विसरलो

• रघुनाथ सोनटक्के

दि. २९ ऑगस्ट २०१९ च्या दै. मराठवाडा संचारमधे प्रकाशित
३ सप्टेंबर २०१९ दै. स्वाभिमानी छावामधे प्रकाशित 

पहिला पाऊस

पहिला पाऊस

जीव कासाविस
शुष्क सारी भुई
सगळ्यांची होई
लाहीलाही

दाटला अंधार
सुसाटला वारा
आसमंत धरा
 गंधाळली

टप टप थेंब
सरीवर सरी
तृप्त सृष्टी सारी
प्राणीमात्र

गर्द झाडेवेली
नटली अवनी
पक्षी गातो गाणी
रानोमाळी

रम्य चराचर
दृश्य मनोहर
हर्ष सभोवार
दाटलेला
• रघुनाथ सोनटक्के ‎

११ जून २०१९ दै. औरंगाबाद केसरी मधे प्रकाशित
१८ जून २०१९ च्या साप्ताहिक सायबर क्राईम मधे प्रकाशित
१५ जून २०१९ च्या दै. स्वाभिमानी छावा मधे प्रकाशित
१९ जून २०१९ च्या दै. वाचकमंच मधे प्रकाशित  
२७ जून २०१९ च्या दै. मराठवाडा संचार मधे प्रकाशित 
साप्ताहिक झी मराठी दिशा, २१ जून २०१९ ला प्रकाशित
http://www.zeemarathidisha.news/Details?NewsId=5624415757003576617&title=pahila%20paus&SectionId=4805737089856539540&SectionName=%E0%A4%95%E0%A4%B5%E0%A4%BF%E0%A4%A4%E0%A4%BE 

                  

 

तू

तू

कवी मी, कविता तू

विषय तू, आशय तू

प्रेरणा तू, कल्पना तू

उपमेय ना, उपमाच तू

सागर मी, सरिता तू

आकाश मी, धरा तू

पियानो मी, तार तू

ताल मी, सुर तू

नयन मी, स्वप्न तू

जीवन मी, आशा तू

• रघुनाथ सोनटक्के

१९ फेब्रुवारी २०१९ च्या साप्ताहिक 'सायबर क्राईम'ला प्रकाशित 
१६ मार्च २०१९ च्या तरुण भारत (नागपूर) मधे प्रकाशित 
२७ डिसेंबर २०१८ च्या लोकमंथन मधे प्रकाशित

बायकोची आठोन

« बायकोची आठोन »

तु गेली सोळून मले
आता तुई आठोन ईवुन रायली
भाकरीचा झाला वांदा
तु माहेरी पोया खाऊन रायली

कोणी कितीबी मना बा
बायकोची सर ना ईवुन रायली
दुद चाललं ऊतू गॅसवर
अन् मॅगीबी जवुन रायली

कपळे धुवा मना तं
नुसतं बॅट ऊळून रायली
मले खायाले कुटके
अन् तु तिकळे भजे तळून रायली

जातांना मनली रागात
तुमाले लयच चळून रायली
दूर जावुन गळ्या मले
तु भारी घळून रायली

टिवी पावाव कितीखेप
मोबाईलची चार्जिंग उळून रायली
या सार्‍यामदे काय मजा
तिकळून नुसतं मले फटू धाळून रायली

• रघुनाथ सोनटक्के

   तळेगाव दाभाडे, पुणे

   मो. 8805791905

  शब्दरसिकचा एप्रिल अंक: http://bit.ly/Rasik-Apr18

वात्रटिकासंग्रह: https://goo.gl/7CcLUw

दिवाळी अंक २०१७: https://goo.gl/RxRw8g

२ जानेवारी २०१९ च्या दै. पुण्यनगरी (विदर्भ आवृत्ती) मधे प्रकाशित

पथीक

पथीक
●●● 

फुले आहेत गोड म्हणून 

सहज त्यांना तोडू नकोस

पथ आहे काटेरी म्हणून 

अर्ध्यावरती सोडू नकोस

खुशाल हसू दे जनास

दुःखावर आपल्या

कुणामुळे तू दुःख आपले

मनातल्या मनात गिळू नकोस

वेगळ्या वाटेचा तू पथीक

सहज कुणी अडवेल वाट तुझी 

संकटांचा साचेल ढीग पुढयात

तरी मनाने खचू नकोस

झालीच नाही कुणा मदत तुझी 

हात मागे कधी ओढू नकोस

पथ आहे काटेरी म्हणून 

अर्ध्यावरती सोडू नकोस

चालत रहा पुढेच

नकोस करू लक्ष विचलीत

कुणी हिणवेल, कुणी रडवेल

भिक त्यांना घालू नकोस

होतील तुझ्याही चुका हजार

शल्य कधी मनात ठेऊ नकोस 

चुकल्यांना वाट दाखव

एकटं कुणा तू सोडू नकोस

पथ आहे काटेरी म्हणून 

अर्ध्यावरती सोडू नकोस

●●●
 रघुनाथ सोनटक्के
दि. २६ मार्च २०१५

२७ डिसेंबर २०१८ च्या दै. स्वाभिमानी छावा मधे प्रकाशित 

शेतकऱ्याची दैना

शेतकऱ्याची दैना

शेतकऱयांचे हाल सोडून भलतंच इथं गाजलं आहे

शेतकर्‍याचं पोर दुष्काळाने उपाशीच निजलं आहे

दुष्काळ जाहीर करून काय साध्य केलं जातं!

मलमपट्टी धोरणांमुळेच आत्महत्येस बाध्य केलं जातं

हमीभाव कधी मिळत नाही कुणी नसतो त्याचा वाली

फेकुन द्यावे लागते दूध, माल रस्त्यावर असाच दरसाली

'हमी' नाही त्याला कशाची फक्त आश्वासनापुरता 'भाव'

साथ नाही निसर्गाची सरकारही ढकलतंय धीमे नाव

पिकवुन त्याने शेतमाल किती घाम गाळला आहे

हमीभावाचा शब्द मात्र कुणी, कधी पाळला अाहे

उद्योगपतींना खुशाल आम्ही करतो कर्ज माफ

फक्त शेतकर्‍यानंच काय केलं एवढं मोठं पाप

कर्जमाफीच्या टाॅनिकने सुधारेल का आत्महत्येचा रोग

हवालदील शेतकर्‍यासाठी येईल कधी बरा योग

घ्यावा लागतो शेतकर्‍याला अडकवुन गळ्यात फास

आत्महत्यांची आकडेवारी सांगताना लागत नाही ढास

शेतकर्‍याचा प्रश्न आता नाजूक अन् गंभीर आहे

प्रत्येकवेळी शासन म्हणते पाठीशी आम्ही खंबीर आहे

आश्वासन देऊन कुठे सातबारा त्याचा कोरा राहतो

उत्पन्न दुप्पट करण्याचा सरकारी फक्त नारा राहतो

वाली त्याचे असल्याचा प्रत्येकाचा तोरा असतो

घोषणाबाजीचाही हेतू नेहमीच कुठे खरा असतो

रघुनाथ सोनटक्के

१४ डिसेंबर २०१८ ला दै. नवाकाळमधे प्रकाशित 

अवयवदान

« अवयवदान »

अवयवदान । करूया सारे

मरून उरा रे । जगती या ।।

पाप-पुण्याचा । कशा लेखाजोखा ।

दुर करा धोका । गरजुचा ।।

मरावे परी या । जगती उरावे

दान करावे । देह आपले ।।

रूढी-समजुतींना । देवुनी फाटे ।

दान करा मोठे । अवयवांचे ।।

अंधाला दृष्टी द्या । कुणाला हृदय

ब्रेनडेड होता । दान करा ।।

काळीज आपलं । देवून थोडं ।।

करा जीव गोड । आजार्‍याचा ।।

किडनी न् डोळे। आहेत दोन

वाचतील प्राण । एक देता ।।

त्वचा, आतडे । करा रक्तदान

वाचवा प्राण । वंचितांचे ।।

• रघुनाथ सोनटक्के

  तळेगाव दाभाडे, पुणे

  मो. 8805791905

९ ऑक्टोबर २०१८ च्या सायबर क्राईम मध्ये प्रकाशित 

  

माझं प्रेम

« माझं प्रेम »

तुझ्यावर माझं किती प्रेम
विचार माझ्या मनाला
चंद्रतारे तर नाही देवु शकेन
पण प्राणही लावेन पणाला

मी खुप प्रेम करतो सखे 
अन् म्हणतेस त्यात काय वेगळं?
झाकून बघ माझ्या डोळ्यात 
सामावलं आहे त्यात सगळं 

मी तुझ्यावर किती प्रेम करतो 
देवू तुला कशाची ग्वाही 
पाहून घे डोळ्यात माझ्या 
चिरून बघ काळजालाही 

खोटंखोटं का होईना हळूच  
एकदा माझ्याकडे बघ 
भरलयं किती माझ्या डोळ्यात प्रेम 
कळेल तुला मग

डोकाऊन बघ जरासे मनात 
छेडून बघ मनाच्या तारा 
लिहून काढ प्रेमाच्या शाईने 
माझ्या मनाचा कागद कोरा 

•••

रघुनाथ सोनटक्के 

तळेगाव दाभाडे, पुणे 

मो. ८८०५७९१९०५

६ सप्टेंबर २०१८ च्या दै. डहाणू मित्र मधे प्रकाशित
 ३० डिसेंबर २०१८ च्या दै. विदर्भ मतदार मधे प्रकाशित