पथीक

पथीक
●●● 

फुले आहेत गोड म्हणून 

सहज त्यांना तोडू नकोस

पथ आहे काटेरी म्हणून 

अर्ध्यावरती सोडू नकोस

खुशाल हसू दे जनास

दुःखावर आपल्या

कुणामुळे तू दुःख आपले

मनातल्या मनात गिळू नकोस

वेगळ्या वाटेचा तू पथीक

सहज कुणी अडवेल वाट तुझी 

संकटांचा साचेल ढीग पुढयात

तरी मनाने खचू नकोस

झालीच नाही कुणा मदत तुझी 

हात मागे कधी ओढू नकोस

पथ आहे काटेरी म्हणून 

अर्ध्यावरती सोडू नकोस

चालत रहा पुढेच

नकोस करू लक्ष विचलीत

कुणी हिणवेल, कुणी रडवेल

भिक त्यांना घालू नकोस

होतील तुझ्याही चुका हजार

शल्य कधी मनात ठेऊ नकोस 

चुकल्यांना वाट दाखव

एकटं कुणा तू सोडू नकोस

पथ आहे काटेरी म्हणून 

अर्ध्यावरती सोडू नकोस

●●●
 रघुनाथ सोनटक्के
दि. २६ मार्च २०१५

२७ डिसेंबर २०१८ च्या दै. स्वाभिमानी छावा मधे प्रकाशित