अवकाळी

अवकाळी
सांडून गेल्या बागा
गळून गेला फुलोर
नासवून गेला पीक
पाऊस तो मुजोर !

ओलाचिंब हरभरा,
गळला आंब्याचा मोहोर,
द्राक्ष-डाळींबाचा सडा
केला कहरच कहर ...

कांदा पुरता नासला,
टमाटी, भाजी सडली
रोजी-रोटीची चिंता
पुन्हा नव्यानं पडली

पिकलं होतं सुपानं
फाडला माझा पदर
कसं काढायचं वर्ष
कसं भरायचं उदर ?

नको तेव्हा बरसला
ऐन आल्यावर बहर
डोळ्यादेखत नासवलं
का प्यावं आता जहर ?

देत नाहीस रे तू जे
मी मागितलं मागणं
पटत नाही देवा तुझं
हे अवकाळी वागणं ...

• रघुनाथ सोनटक्के

२२ मार्च २०२०, दै. लोकशाही वार्ता
 २३ एप्रिल २०, दै. युतीचक्र, १ जून २०२० दै आदर्श महाराष्ट्र