तुय लगन होईन तवा

तुय लगन होईन तवा

तुय लगन होईन तवा 
जाशीन तु दूर 
पण माह्या जीवात आग 
डोयात येईन पूर 

तुया लग्नात पोरी 
हासतीन तुये ओट
मले मातरं प्या लागीन 
तुया जुदाईचा घोट 

तुया हातावरची मेंदी 
रंगुन जाईन फार 
अन् लोकं उडवतील 
तुया लग्नाचा बार 

होईन तुयं शुबमंगल 
अन् पळीन गयात हार 
मी मातरं होईन
जागच्या जागी ठार 

लळशीन तु बेज्या 
सारं जग पाहीन 
कोणासाठी लळतं 
कोणाले नाई कईन 

मी तुयावर पेरम करो 
मले ध्यानात ठेवजो 
आठोन आली तवा 
चंद्राकळे पायजो 

या जन्मात नाही 
तुय माय मिलन 
पुढच्या जन्मी ना
तुया बिगर जमन 

● रघुनाथ सोनटक्के ●

१८ जानेवारी २०१९ च्या दै. स्वाभिमानी छावा मधे प्रकाशित