दुस्काळ

दुस्काळ

म्या जगाचा पोशिंदा
खायला ना उरला घास
या दुस्काळापायी पडला
माज्या गळ्यामंदी फास

कोरड्या पडल्या हीरी
सुकले नदी नाले
टक लावुन बसलोय
सपाट आभायाले

भुई झाली कोरडी
आभाय झालं सुनं
पाण्याविना आता
जगावं कसं जीणं

खाऊ कसं घास
ऊपाशी गोठ्यापुढं
सुकली बाभळी
गुरांची झाली हाडं

सपान डोळ्यामंदी
होतं तसं मुरलं
कर्ज, उसनवारीतच
आलं तसं सरलं

फाटक्या माज्या धोतरवाणी
फ़ाटली धरणीमाई
ओवायला पुरणां ही
सरकारी भरेपाई

बि-बियाणंसाठी आता
ठेवू म्हंतु साैभाग्याचं लेणं
हवालदील झालंय हे
माजं फाटलेलं जीणं

~ रघुनाथ सोनटक्के

    तळेगाव, पुणे

    ८८० ५७९ १९०५

रोखठोक दिवाळी अंक २०१७ मध्ये प्रकाशित
३  आणि १४ जानेवारी २०१९ च्या दै. स्वाभिमानी छावा , 
५ जानेवारी २०१९ ला दै. डहाणू मित्र मधे  व 
१० जानेवारी २०१९ च्या दै. वाचकमंच प्रकाशित 
७ फेब्रुवारी २०१९ च्या दै. बलशाली भारत  मधे प्रकाशित 
एप्रिल २०१९ च्या मासिक चपराक मधे प्रकाशित
१२ मे २०१९ दै. संघर्ष समाजवादाचा मधे प्रकाशित 
१७ मे २०१९ दै. बंधुप्रेम मधे प्रकाशित 
२ जून २०१९ लोकशाही वार्ता (प्रतिबिंब पुरवणी) मधे प्रकाशित 
९ जून २०१९ दै. विदर्भ मतदारमधे प्रकाशित